Аҧсны Амитрополиа Ҧшьа аофициалтә саит > Адокументқәа > Адокументқәа зегьы > Аиашахаҵаратә Ныха Иҧшьоу Аизара Дуӡӡа Ахантәаҩы Зегьрылаиҧшьаӡоу Варфоломеи I Константинопол – Рим Ҿыц Архиепископи Адунеизегьтәи Апатриархи

Аиашахаҵаратә Ныха Иҧшьоу Аизара Дуӡӡа Ахантәаҩы Зегьрылаиҧшьаӡоу Варфоломеи I Константинопол – Рим Ҿыц Архиепископи Адунеизегьтәи Апатриархи

2
Шәара Зегьрылаиҧшьаӡоу!
 
2016 ш. лаҵарамза 15 рзы ац. апостол Симон Канатәи имонастыр аҟны Аҧсны Афон Ҿыц имҩаҧысит изаамҭанытәиу Аҩбатәи Аныха-Жәлартә Еизара. Уи иалахәын ақьырсиан иашахаҵара ныҟәызго 1000-ҩык инереиҳаны Аҧсны атәылауаа.
 
2011 ш. Шәара Зегьрылаиҧшьаӡоу шәыхьӡалеи Аиашахаҵаратә Ныхақәа зегьы рхадацәа рыхьӡалеи инашьҭын Актәи Аныха-Жәлартә Еизара Ааҧхьара. Ааҧхьара ианын ҳтәыла ақьырсиануаа зҭагылоу ауадаҩреи ари азҵаара ахәаҧшразы Адунеизегьтәи Апатриархиа хантәаҩра зызнауа Аиашахаҵарабжьаратә комиссиа аҧҵарази аҳәара.
 
2011 ш. лаҵарамза 15 рзы Афон Ҿыц имҩаҧысыз 1.110 – ҩык Аҧсны Аҳәынҭқарра атәылауаа злахәыз, урҭ рахьтә 753-ҩык ақьырсиан иашахаҵара ныҟәызго атәылауаа рыбжьы ахьырҭииз Актәи Аныха-Жәлартә Еизара иҟанаҵаз Ааҧхьара шьақәырҕәҕәо, ҳара иаҵшьны иазгәаҳҭоит Аҧсны аиашахаҵаратә уаажәларра рыҧсҭазаараҟны ишьақәгылаз аҭагылазаашьа хьанҭа алҵразы амҩақәа рыҧшааразы ихьыҧшым Аныхақәа ралархәра хымҧада иаҭахны ишыҟоу.
 
Ақырҭуа Иашахаҵаратә Ныха Аҧсны Аныхаҿы иҟоу ауадаҩрақәа аныхабжьаратә ҩаӡараҟны алацәажәара аҭахны иаҧхьаӡом. Абри ауп мзыз хадас иамоу Аҧсны аиашахаҵаратә қьырсиануаа рыҧсҭазаараҟны иҟоу аныха аҧҟарақәа ирықәымшәо аҭагылазаашьа иахьа уажәраанӡагьы аӡбара алызмыршаз, Аныхатә еиҿкаарагьы аҟамзаара зыхҟьо.
 
Аҧсуаа ақырҭуа етнос иахәҭакым, Ақырҭуа ныха иагьаҵанакуам. Ҭоурыхла Аҧсны Мцхеҭа архиепископи Ивериа акатоликоси рныхатә мчхара ахаангьы иаҵанакӡомызт. Аха 1918 ш. Қырҭтәыла Адемократиатә республика архәҭақәа Аҧсны рымпыҵархалеит, иара убасгьы Аҟәа ақ. аҟны дықәыргылан Урыстәылатәи Аныха иалҵны, зхала зхатәы хьыҧшымра рылазҳәаз, Аҧсны ахьынӡанаӡааӡо ныхатә ҧҟарала иара амчхара иаҵанакуеит ҳәа аҳәамҭа ҟазҵаз Қырҭтәылатәи Апатриархиа амитрополит.
 
1990 ш. Адунеизегьтәи Апатриархиа, иҟаз аполитикатә ҭагылазаашьақәа зегьы ҳасаб рзуразы алшарақәа анамамыз, Ақырҭуа Иашахаҵаратә Ныха ахьыҧшымреи апатриархиатә статуси анаҭеит 1943 шықәсазы Ақырҭуеи Аурыс Иашахаҵаратә Ныхақәеи рыбжьара ишьақәыргылаз аҳәаақәа ирҭагӡаны, даҽ. иаҳҳә. ҧасатәи Қырҭтәылатәи Асоветтә Социалисттә Республика аҳәаақәа иҭагӡаны.
 
Аҧсны жәлари Ақырҭуа Ныхеи реизыҟазаашьақәа аиашьаратә, аиҩызаратә ҟазшьа рымоуп уҳәартә иҟаӡам. Уи мзызс иаиуит 1918 ш. инаркны иахьа уажәраанӡа Ақырҭуа Ныха Қырҭтәыла аиҳабыра аҧсуааи егьырҭ амилаҭқәеи рганахьала имҩаҧнаго амилаҭеилыхратә политика иахьадгылоз. Ақырҭуа Патриархиа 1992-1993, 1998-и 2001-тәи ашықәсқәа раан аҭыҧ змаз аибашьра, иара убас 2008 ш. Алада Уаҧстәылатәи ажәлар ирҿагыланы имҩаҧыргоз агрессиеи раанкыларазы иқәгыламызт.
 
Милаҭрацәала иеилоу Аҧсны аиашахаҵаратә жәлар ахаангьы ақырҭуа иерархцәеи ақырҭуа патриархиеи рганахьала хылаҧшра рымаӡамызт. Ақырҭуа Ныха аибашьра аҿагылара аҭыҧан, есқьынгьы Қырҭтәыла аҳәаақәа реиҭашьақәыргылара иарҭоу аҵакы ду атәы аҳәоит, убасалагьы иара аҳәынҭқарра амилаҭеилыхратә политика иадгылан.
 
Убри аҟнытә аиашахаҵаратә уаажәларреи Аҧсны жәлари Ақырҭуа Иашахаҵаратә Ныха амчхара азханаҵом, ихьыҧшым Аиашахаҵаратә Ныхақәа рҿаҧхьа Аҧсны Аҳәынҭқарраҟны Ақырҭуа Иашахаҵаратә Ныха аиурисдикциа иаҿагылоит.
 
Абри иазкын 2013 ш. имҩаҧгаз Аҧсны ауааҧсыра рызҵаанҵа, убасҟан 70.000 –ҩык Ақырҭуа Иашахаҵаратә Ныха алҵразы, ихьыҧшым Аҧсны Аныха аиҭашьақәыргыларазы рнапы аҵарҩит.
 
Шәара Зегьрылаиҧшьаӡоу!
 
Ихьыҧшым Ныхақәак рҭаххарала, Аныха ҿыцқәа раҧҵареи ахьыҧшымра рыҭареи ирыдҳәалоу азҵаара Иҧшьоу Аизара Дуӡӡа аҧҟара иалган. Ҳгәыҕуеит, уи ҳтәылаҟны Аныха аканонтә проблема аӡбара аруадаҩрым ҳәа.
 
Аҩбатәи Аныха-Жәлартә Еизара алахәылаҩцәа Шәара Зегьрылаиҧшьоу, Иҧшьоу Аизара Дуӡӡа Ахантәаҩык иаҳасабала шәышҟа еиҭа ааҧхьара ҟарҵоит Аҧсны ақьырсиануаа рҭагылазаашьа зҿлымҳара ашәҭарц. Иара убас ҳара Иҧшьоу Аизара Дуӡӡа аҿаҧхьа иҳарҵабыргуеит Ақырҭуа Иашахаҵаратә Ныха 2010 ш. раахыс «Пицундеи Аҟәа-Аҧснытәи амитрополит» ититул ныҟәызго акатоликос-апатриарх Илиа дызхагылоу аделегациа Аҧсны ақьырсиануаа хаҭарнакра рзура ишақәиҭым.
 
Ҳара даҽазныкгьы аҳәара ҟаҳҵоит Адунеизегьтәи Апатриархиа хантәаҩра зызнауа Аиашахаҵарабжьаратә комиссиа аҧҵаразы Ақырҭуа Иашахаҵаратә Ныха аҳәаақәа реиҭахәаҧшреи Аҧсны ақьырсиантә уаажәларра рыстатус ашьақәыргылареи рзы.
 
Ҳгәыҕуеит, ҳ-Анцәа Иаса Қьырса ҳрыцҳаишьар, Аҧсны ақьырсиантә уаажәларра хара имгакәа Иаку Аизаратә Апостолтә Ныха иахәҭакны иҟалап ҳәа.
 


 
Шәахәаԥш иҵегь: Аҩбатәи Аныха-Жәлартә Еизара